ILEMELA NA SERA YA KIJIJI KIPYA CHA MAENDELEO.

Halmashauri ya Manispaa Ilemela leo imefanikiwa kufanya mazungumzo na wawezeshaji kutoka nchini Korea ikiwa ni jitihada katika kutekeleza sera ya Kijiji cha Maendeleo

Mazungumzo hayo yaliyoanzia Ofisi ya Mkuu wa Mkoa Mwanza na baadae kuishia kwa wananchi wa Kijiji cha Ihalalo kata ya Sangabuye yaliyohusisha wawezeshaji kutoka nchini Korea, Wananchi, Ofisi ya Mbunge wa Jimbo la Ilemela na Halmashauri ya Manispaa kama hatua za mwanzo kukifikia kijiji cha maendeleo.

Wakifafanua kwa wananchi hao wageni hao wamesema kijiji cha maendeleo ni sera shirikishi iliyosaidia kuleta mageuzi ya haraka kimaisha kwa watu wa Korea miaka kadhaa iliyopita hasa maeneo ya Vijijini huku ikijumuisha nguvu kubwa ya wananchi wenyewe na vipaumbele vyao katika kujikwamua kimaisha.

Akizungumza mbele ya wananchi wa Ihalalo Katibu Ofisi ya Mbunge wa Jimbo la Ilemela Ndugu Heri James amesema kuwa ndoto ya Mbunge wa Jimbo hilo ni kuiona Ilemela katika Kilele cha mafanikio huku akitanabaisha kuwa hayo hayatafanikiwa kama ushirikiano wa wananchi hautakuwepo

"…Mbunge wenu anafanya jitihada kubwa mchana na usiku kuhakikisha anawaletea maendeleo na haya ya leo ni matokeo ya Ziara yake Lakini sisi kama wananchi tujue tuna la kufanya na wajibu wetu kila tutalopanga kulifanya tuwe wa kwanza kulitekeleza…''

Aidha Mstahiki Meya wa Manispaa Ilemela ambae pia ni Diwani wa Kata ya Mradi Mhe Renatus Mulunga amewashukuru wageni hao kwa kuamua kuanzisha Kijiji cha Maendeleo huku akiwahakikishia ushirikiano wa Halmashauri katika kufanikisha mradi huo kwa wananchi.

Nao wananchi wa Ihalalo wameishukuru Serikali na Ofisi ya Mbunge kwa jitihada mbalimbali wanazozifanya kuhakikisha wananchi wanapata maendeleo  huku wakiahidi ushirikiano wao wa hali na mali kukifikia Kijiji cha Maendeleo.

"Ilemela ni yetu,tushirikiane kuijenga"

Imetolewa na
Office ya mbunge

 Ilemela-Mwanza