ILEMELA NA MIKAKATI YA KUINUA UBORA WA ELIMU

Mbunge wa Jimbo la Ilemela na Naibu Waziri wa Ardhi Nyumba na Maendeleo ya Makazi Daktari Angeline Mabula ametekeleza ahadi yake aliyoitoa katika kipindi cha kampeni kwa kuhakikisha anainua na kuboresha kiwango cha Elimu Jimboni humo ikiwa ni pamoja na kuzisaidia Shule zote zinazofanya vibaya wilayani huko ili kutoa fursa sawa kwa kila mtoto hasa masikini kufikia ndoto zake

Katika kuhakikisha hili linafanikiwa Mbunge huyo leo ametoa vitabu 720 vya masomo ya Sayansi pamoja na kusaidia utatuzi wa baadhi ya changamoto zinazokabili Shule hizo za Sekondari Jimboni Ilemela kwa kuanza  kuzitembelea Shule za mfano kama Mihama Sekondari iliyopo Kata Kitangiri, Kilimani sekondari iliyopo Kata Kawekamo na Ibinza iliyopo Kata Nyamhongoro

Akimkaribisha Mheshimiwa Mbunge Katibu wa Ofisi ya  Mbunge huyo Comred Heri James  ameeleza kuwa kumekuwepo na utaratibu wa kupongeza Shule zinazofanya vizuri ila Jamii na Viongozi wamekuwa hawana utaratibu wa namna gani wanawatia moyo na kusaidia Shule zote zinazofanya vibaya kitaaluma, Hivyo basi Mheshimiwa Mbunge wa Ilemela amefungua Ukurasa mpya katika kuziwezesha Shule zote zilizo chini kitaaluma ndani ya Jimbo hilo kuanza kufanya vizuri Kimkoa na Kitaifa

Nae Mbunge wa Jimbo hilo amesema kuwa kwa kipindi chote cha Uongozi wake atahakikisha anashirikiana na wananchi naTaasisi nyengne zozote ili kuleta Maendeleo ya moja kwa moja kwa Wananchi wa Ilemela huku akiwataja Bwana Steve na Bi Judith walioshirikiana na Taasisi ya Angeline Foundation katika kusaidia upatikanaji na Ugawaji wa vitabu hivyo

Mbunge ameendelea kwa kusema kuwa katika kampeni zake aliahidi kuzipa zawadi Shule zote zitakazofanya vizuri lakini akaona kuwa  inawezekana wanaofanya vibaya ni sababu ya kukosekana kwa baadhi ya vitendea kazi kama vitabu na kuona ipo haya ya kuitatua changamoto hiyo katika safari ya Tanzania ya Viwanda

'… Kuzidisha wataalamu wa masomo ya Sayansi nadhani ndo tumeianza safari ya katika kuifikia Tanzania ya Viwanda kwani tutakuwa na wataalamu wa kutosha waliosoma masomo ya sayansi watakaosaidia viwanda hivyo…'

Wakati huo huo Mheshimiwa Mabula amemwomba Afisa Elimu wa Halmashauri ya Ilemela Mwalimu Kasandiko kuanza kuzitumia Chaki alizozitoa Mkoa Simiyu zinazojulika kama MASWA CHALKS kama majaribio na baadae kutumika kwa Wilaya nzima kama hazitakuwa na Tatizo lolote ili kukuza na kutoa fursa ya kukua kwa bidhaa zinazozalishwa na Viwanda vya ndani

Akihitimisha Afisa Elimu wa Manispaa Ilemela amemshukuru Mbunge huyo na kusema kuwa amekuwa Mbunge wa kuigwa kwani mara zote yupo Jimboni kwa shughuli za kimaendeleo na kumhakikishia ushirikiano katika kuboresha Elinu kwa wilaya hiyo..

“Ilemela ni yetu, tushirikiane kuijenga”

Imetolewa na
Ofisi ya Mbunge 
Jimbo la Ilemela

25/11/2016