MBUNGE WA ILEMELA AWA MGENI RASMI KATIKA MAHAFALI SHULE YA WASICHANA HOLYFAMILY MKOLANI.

Mheshimiwa Mbunge wa Jimbo la Ilemela na Naibu Waziri wa Ardhi Nyumba na Maendeleo ya Makazi Daktari Angeline Mabula leo amehudhuria Mahafali ya Pili tangu kuanzishwa  kwa Shule ya Sekondari  ya Wasichana Holyfamily iliyopo Kata ya Mkolani Nyamagana Mwanza katika kuhakikisha anawatumikia waTanzania wote na kuhamasiha maendeleo na tija kwa Taifa

Pamoja na kutoa salamu kutoka kwa Mbunge wa Nyamagana kwa hadhara hiyo Daktari Angeline Mabula amewaasa wanafunzi hao kuyaendeleza maadili na misingi mema waliokuwa nayo shuleni huku akiwafafanulia umuhimu wao na utegemezi wa  Taifa kwa kuwataka kuziishi ndoto zao kwa vitendo sanjari na kuwakumbusha wajibu wa wazazi kwa watoto katika suala zima la kuisaidia serikali kutimiza lengo la kutoa Elimu Bure na yenye manufaa kwa wananchi wote

Aidha Mheshimiwa Daktari Mabula amewataka wahitimu waliokwisha  nufaika na mikopo ya Elimu ya Juu kulipa madeni yao ili kutoa fursa kwa vijana wengine masikini waweze kunufaika na mwisho kufikia malengo yao kwa kupata Elimu bora

'…Lengo la Serikali ni kuhakikisha wananchi wake wanapata Elimu bora na kwa unafuu lakini niwatake wale waliokwisha nufaika na mikopo ya Elimu ya Juu kulipa madeni yao ili na wengine waweze kunufaika, Suala la Elimu bure halimaanishi kuwa mzazi huna wajibu katika kumpatia mtoto Elimu bora wazazi na walimu kwa pamoja tunaowajibu katika kufikia malengo na sera ya Serikali katika kuitoa hii Elimu bure kwa kutimiza wajibu wetu…'

Akizungumza Mwenyekiti wa bodi ya Shule Ndugu Luvulilo Elisha Pamoja na Kumshukuru Mheshimiwa Naibu Waziri  Daktari Angeline Mabula amewaasa wanafunzi wa Shule hiyo kuiga mfano wa Mgeni rasmi huyo kwa  kuwa mwanamke jasiri, mpenda maendeleo, anaeweza kujisimamia na mwenyekuandika historia kwa kuwa mwanamke wa kwanza kuwa Mbunge wa Jimbo kwa kuchaguliwa tangu kuanzishwa kwa Jimbo la Ilemela

'..Huyu ni mwanamama Jasiri, mwanamama anayejisimamia, mwanamama mpenda maendeleo hivyo nawataka wanafunzi nyinyi mnaohitimu leo kuiga mfano wake kwa kuendeleza pale wanapoishia wanawake wenzenu..' alisisitiza

Nae mwanafunzi Edith Lugela aliyepata zawadi ya kuwa mwanafunzi bora wa Shule hiyo kwa mwaka huu na kutwaa tuzo ya malikia wa shule amemshukuru Mheshimiwa Naibu Waziri Mabula kwa moyo wake wa kujitoa kwa jamii inayomzunguka hasa katika kuhakikisha jamii inajikwamua na kujiletea maendeleo.

' Ilemela Yetu, Tushirikiane Kuijenga'

Imetolewa na
Ofisi ya Mbunge
Jimbo la Ilemela Mwanza

12.11.2016