MBUNGE WA ILEMELA AFANYA ZIARA YA KUSIKILIZA KERO ZA WANANCHI NA KUHAMASISHA MAENDELEO

Mbunge wa Jimbo la Ilemela na Naibu Waziri wa Ardhi, Nyumba na Maendeleo ya Makazi Dkt Angeline Mabula amefanya Ziara kwa Kata ya Buzuluga ikiwa ni muendeleo wa Ziara yake kwa kata zote 19 zilizomo ndani ya Jimbo la Ilemela katika kuwasikiliza wananchi, kutatua kero zinazowakabili sambamba na kuwahamasiha juu ya utendaji wa shughuli mbalimbali za kimaendeleo

Katika ziara hiyo Mhe Mbunge ameambata na Mkuu wa wilaya Ilemela, mkurugenzi na Wakuu wa Idara za Manispaa Ilemela ili kuweza kubainisha changamoto zinazowakabili wananchi na kuzipatia majawabu ya papo kwa hapo

Akizungumza katika Ziara hiyo Mhe Mbunge amewahimiza wananchi wa kata Buzuluga juu ya kuwa wamoja na kushirikiana katika kutatua changamoto za kata hiyo sambamba na kuwataka kuacha kujenga bila ya kufata taratibu ili kuruhusu huduma nyengine za kijamii kuendelea pamoja na kuitumia fursa ya urasimishaji wa makazi na upangaji mji ili kuongeza thamani ya ardhi waliyonayo na si kuuza mashamba tupu

'… Ili kazi ziende ni lazima tushirikiane Sisi, mkuu wa wilaya, Mkurugenzi na Meya tunashirikiana lakini msikubali kuuza mashamba uzeni viwanja vilivyokwishapimwa na kupewa hati ili kuongeza thamani ya viwanja vyenu…'

Akimkaribisha Mbunge huyo Mkuu wa wilaya Ilemela mhe Dkt Leonard Masale mbali na kumshukuru kwa jitihada zake za kila siku katika kuhakikisha anawatumikia wana Ilemela amewataka wazazi na watendaji wa wilaya hiyo kushirikiana katika kutatua changamoto zinazoikabili sekta ya Elimu wilayani humo na si kuiachia serikali pekee huku akiwataka machinga wa wilaya hiyo kuanzisha Umoja wao utakao kuwa na Uongozi ili iwe rahisi kupata msaada kutoka serikalini tofauti na kumsaidia mtu mmoja mmoja

Kwa upande wake Mkurugenzi wa Manispaa Ilemela Mhe John Wanga pamoja na kujibu maswali yote yanayohusu Manispaa yake kwa wananchi amewataka viongozi wa mitaa kuwa sehemu ya utatuzi wa migogoro ya ardhi katika maeneo yao na kuwa mstali wa mbele katika kuleta maendeleo huku akisisitiza ushirikiano na umoja kwa wadau wote wa maendeleo

Ziara ya Mhe Mbunge itaendelea tena leo kata ya Mecco 

' Ilemela ni yetu, Tushirikiane kuijenga '

Imetolewa na
Ofisi ya Mbunge
Jimbo la Ilemela
17.12.2016